Flugmódelfélag Suðurnesja

Minningarsamkoma

29.06.2008

Flugmódelfélag Suðurnesja hélt minningarsamkomu fyrir fjölskyldu og ættingja Arnar Kjærnested og um leið var vellinum formlega gefið nafnið Arnarvöllur honum til heiðurs. Grillað var ofan í viðstadda og einnig var boðið upp á marsipantertu og rann þetta allt ljúflega niður hjá viðstöddum.

Eftir frábæra flugviku þá hefur Kári eitthvað þurft að blása svo ekki var mikið um flug utan dyra en þyrlast var innan dyra. Hægt er að sjá myndir frá deginum í myndasafni félagsins.

Erlendir gestir

22.06.2008

Það var nóg um að vera í síðustu viku(18.júní) en þá komu tveir breskir módelmenn, þeir Ali Mashinchy og Shaun Newby, í heimsókn og áttu góða kvöldstund með okkur út á velli. Ali tók smá sýningarflug fyrir mannskapinn í hífandi roki en annars fínu veðri og voru félagsmenn og aðrir gestir mjög hrifnir af sýningunni sem boðið var upp á. Ekki sást á fluginu að neitt væri að veðrinu og var ótrúlegt að sjá hversu mikill munur er í raun og veru á atvinnumönnum erlendis frá og þeim bestu hér heima.

Heimsóknin gaf mönnum greinilega byr undir báða vængi því ýmsar flugkúnstir hafa sést hjá félagsmönnum síðustu daga.