Það er víst ekki hægt að segja að veðrið hafi leikið við okkur það sem af er vetri en þó hafa komið einn og einn blíðudagar inn á milli og hafa félagsmenn verið duglegir að nýta sér þá sér til flugs.

En í skammdeginu þá er hægt að sýsla við ýmislegt, hvort heldur sem er smíði flugmódela, skoða myndir frá liðnu sumri nú eða vídeóbúta eða fylgjast með á spjallinu. En allir láta sig þó eflaust dreyma um komandi sumar og rifja um leið upp árið sem er að líða.

Það styttist í aðalfund félagsins en til stendur að halda hann upp úr miðjum janúar og verður það nánar auglýst þegar nær dregur. Í tengslum við það fer vinna við vídeóannálinn að komast á lokastig svo þeir sem hafa efni sem nota má þar eru vinsamlegast beðnir um að hafa samband við gjaldkera.